ԷՔՍԿԼՅՈՒԶԻՎ. «Ազգային երգիչ»-ը մեկնարկում է․ ինչպե՞ս են անցել լսումներն ու ի՞նչ է սպասվում հեռուստադիտողին (լուսանկարներ)
Սեպտեմբերի 15-ից «Շանթ» հեռուստաընկերության եթերում կհեռարձակվի «Ազգային երգիչ» նախագիծը։ 2 տարուց ավելի տևած դադարից հետո հեռուստաընկերությունը մեկնարկում է նոր նախագիծ՝ սեփական ուժերը փորձել ցանկացողների, նորը սովորելուն պատրաստների և ժողովրդականն ու ազգայինը ժամանակակից մատուցմամբ ներկայացնելով հետաքրքրվողների համար։
Ի դեպ, «Ազգային երգիչ»-ը չպետք է շփոթել «Ժողովրդական երգիչ» նախագծի հետ.
««Ազգային երգիչը» տարբերվում է նրանով, որ այստեղ գալիս են ոչ միայն ժողովրդական, այլև՝ էստրադային, փոփ, ռեփ, ռոք ոճերում երգող մասնակիցները: Բոլորն ի վերջո՝ գալա համերգների ժամանակ, երգելու են ժողովրդական երգեր, բայց այսօրվա շնչով ու նոր մատուցմամբ։ Բենդ, դիջեյ, շոու, ժամանակակից գործիքներ․ կարճ ասած՝ մոդեռն ու նորովի մեկնաբանություն, ինչը նոր գույն կտա ժողովրդական երգին»,-ArenaNews.am-ի հետ զրույցում պատմեց նախագծի գլխավոր պրոդյուսեր Աննա Թադևոսյանը։
Ինչ վերաբերում է երաժշտության մոդեռնիզացմանը, նախագծի երաժշտական պրոդյուսեր Գիսանե Պալյանի խոսքով՝ ուշադիր ու զգույշ են մոտեցել ցանկացած էքսպերիմենտի․
«Մենք շատ զգոն ենք, որ այն մեղեդային գիծն ու կորիզը, որը բնօրինակի մեջ է եղել, հանկարծ չփոխվի։ Ներգրավել ենք ժողովրդական երգերի լավագույն մասնագետներին, որոնք ուշիուշով հետևում են, որ որևէ բացթողում չլինի և պահպանելով բնօրինակը՝ մեկնաբանություն արվի ժամանակակից ձևով: Այս հարցը շատ ենք կարևորում, քանի որ մեր աչքի առաջ տեսնում ենք, որ շատ հաճախ նորացնելու փոխարեն աղավաղում են ժողովրդական մեղեդիներն, ու բնօրինակի փոխարեն հայտնվում է մի բան, որը կարծես այդ երգն է, բայց իրականում այդ երգի հետ որևէ կապ չունի»։
Նոր մատուցումը հոգեհարազատ կլինի նաև երիտասարդներին, որոնք սովոր են ժամանակակից հնչյուններին, գործիքավորումներին և տենդենցներին․
«Ինչպես «Ժողովրդական երգիչ» նախագիծն արթացրեց սեր այս ոճի հանդեպ ու մարդիկ մասայաբար սկսեցին հետևել ժողովրդական երգին, նույն անելու է նաև «Ազգային երգիչը»։ Ամեն մեկը կարողանալու է գտնել այն ռիթմերը, որոնք իրենց հարազատ են: Երիտասարդները կարողանալու են պարել ժողովրդական երգի տակ, մեծահասակները լսեն իրենց սիրելի երգերը»,-ասաց Աննա Թադևոսյանը։
Նախագծի մասնակիցների համար սահմանված՝ 16-ից 26 տարեկան շեմը պատահական չի ընտրվել․ Գիսանե Պալյանի խոսքով՝ ցանկություն կա այս ամենում ներգրավել հենց այդ լսարանին․
«Մասնակիցները բավական բարձր պատրաստվածություն ունեին․ դիմողների թվում հատկապես շատ էին ժողովրդական ոճի կատարողները: Նրանց ընտրությունն արվել է մի քանի չափանիշներով․ քանի որ ներկայացնելու ենք շոուծրագիր, հաշվի է առնվել ոչ միայն վոկալային կարողություններն, այլև՝ արտիստիզմը, բեմական կեցվածքը, խարիզման, մատուցումը: Աշխարհում ոչ մի երգիչ միայն անթերի տեխնիկայով չի կարող զարմացնել․ պետք է լինել արտիստ, մատուցել հոգով և էմոցիայով»:
Աննա Թադևոսյանի խոսքով ևս՝ ունեն շատ ուժեղ մասնակիցներ․ «Սերունդ է փոխվել, «Ժողովրդական երգիչ» նախագծից 4 տարի է անցել, X factor-ից՝ 3 տարի: Երբ նախագծերն իրար հաջորդում են, մասնակիցների մեջ հաճախ կարելի է նույն դեմքերը տեսնել․ այս դեպքում նախորդ նախագծերին մասնակցած կատարողները շատ քիչ էին՝ նոր սերունդ է եկել, նոր դեմքեր»։
Ինչ վերաբերում է ժյուրիի կազմին, գլխավոր պրոդյուսերի խոսքով՝ ազգային երգչին որոշել են ազգովի ընտրել։ Լսումների փուլին ժյուրիի անդամներն են՝ Սևակ Ամրոյանը, Արփին, Անդրեն, Ավետ Բարսեղյանը և Արսեն Գրիգորյանը՝ Մրոն:
Հաջորդ փուլերում միանալու են ժյուրի նոր անդամներ։ Ժյուրիի կազմում հնարավորություն կլինի տեսնել գրեթե բոլոր սիրված երգիչներին, հաղորդավարներին, գործիքավորողներին։