Հարավային Կորեայի նոր նախագահ Մուն Չժե Ինն առաջարկել է 2030թ. ֆուտբոլի աշխարհի առաջնությունն անցկացնել Հյուսիսային Կորեայի, Չինաստանի, Ճապոնիայի եւ Թայվանի հետ համատեղ: Այդ մտահղացման մասին նա Սեուլում պատմել է ՖԻՖԱ-ի նախագահ Ջանի Ինֆանտինոյին:

«Եթե մեր հարեւան երկրները կարողանային մեզ հետ միասին անցկացնել ֆուտբոլի աշխարհի առաջնությունը, ապա դա կնպաստեր Հարավային եւ Հյուսիսային Կորեաների եւ Հյուսիս-արեւելյան Ասիայի երկրների միջեւ խաղաղության հաստատմանը: Կցանկանայի, որ ՖԻՖԱ-ի նախագահը շահագրգռված լիներ այս ծրագրի իրագործման հարցում»,- Հարավային Կորեայի նախագահի խոսքը մեջբերում է BBC-ն:

Հիշեցնենք, որ Հարավային Կորեան Ճապոնիայի հետ անցկացրել է 2002թ. աշխարհի առաջնությունը:

Աղբյուրը՝ past.am