«Անկախ նրանից՝ պաշտոնյայի երեխա է, պաշտոնյայի երեխա չէ, ինքը ստանում է ոսկե մեդալը իր գիտելիքների համար»,-այսօր կառավարության նիստից հետո, պատասխանելով լրագրողների հարցին, թե արդյոք բարոյակա՞ն էր ոսկե մեդալով պարգեւատրել մեկին, որը քրեական հանցագործություն է կատարել, ասաց ԿԳ նախարար Լեւոն Մկրտչյանը:

Խոսքը Հրազդանի քաղաքապետի որդու պարգեւատրման  մասին է, որն օրերս ՀՀ նախագահ Սերժ Սարգսյանից ոսկե մեդալ ստացավ` Գիտելիքի եւ դպրության օրվա կապակցությամբ:

Հիշեցնենք, որ այս տարվա հունիսին Հրազդանի քաղաքապետի անչափահաս որդին մահվան ելքով վրաերթի էր ենթարկել մի քաղաքացու: «Ես հետաքրքրվել եմ, իսկապես՝ նա սովորող երիտասարդ է»,-ասաց պարոն Մկրտչյանը:

Հարցին, թե դեր չի՞ ունեցել, որ այդ երիտասարդի հայրը կարկառուն հանրապետական է եւ Հրազդանի քաղաքապետը, պարոն Մկրտչյանը պատասխանեց.

«Ժամանակին, իմ նախաձեռնությամբ, 1998 թվականին մեդալից արտոնությունները վերացրեցին Հայաստանի Հանրապետությունում, այսինքն` մեդալ ստացողը որեւէ արտոնություն` ընդունելության եւ այլն չկա, ինքը բարոյական չափանիշ է, որից հետո կտրուկ վիճակը կարգավորվեց, եւ ըստ էության, մեդալակիրները այն երեխաներն են, որոնք նորմալ սովորում են: Որեւէ պաշտոնյայի երեխա իրավունք չունի՞ մեդալակիր լինելու: Դպրոցի տնօրենին հարցրեք` դեր ունեցե՞լ է: Ես կարծում եմ, որ պաշտոնյաների երեխաները նույն ձեւի երեխաներ են, ոնց որ բոլոր երեխաները»:

Մանրամասները` տեսանյութում 

Աղբյուրը՝ aravot.am