Ինչպե՞ս է Շառլ Ազնավուրի հայրն օգնել հայ զինվորներին «քննությունից» հետո
«Ազնավուր» հիմնադրամի ֆեսյբուքյան էջում ֆրանսահայ շանսոնյեի հոր՝ Միշա Ազնավուրի մասին պատմություն է ներկայացվում՝ կապված Հայրենական պատերազմի ու հայ զինվորների հետ:
«Երբ ֆաշիստների կողմից բռնազավթված Փարիզում դիմադրողական շարժում ծավալվեց, ֆաշիստներն էլ ավելի դաժան ու անողոք դարձան: Գեստապոն ամեն օր ավելի էր խստացնում կտտանքներն ու խուզարկումները։ Հենց այդ պայմաններում Միշա Ազնավուրը՝ Շառլի հայրը, սկսեց վտանգավոր աշխատանք տանել գերմանական բանակի հայ «կամավորների» հետ: Առօրյա զրույցի ու կատակների միջոցով համոզվում էր, որ նրանք հայ են, խնդրում էր երգել, պատմել հայրենի գյուղերի մասին և այդպես կարող էր հստակ տարբերել՝ զինվորները հայերենը սովորել են ի ծնե, թե այն դպրոցներում, որտեղ ֆաշիստները գործակալների էին պատրաստում։ Ընդ որում՝ նա դա անում էր «Րաֆֆի» ռեստորանում, որտեղ այդ պահին աշխատում էր և ընթացքում սպասարկում հարևան սեղանին նստած սպաներին։
«Քննությունն» ավարտելուց հետո Միշան հայ զինվորներին հասկացնում էր, որ կարող է օգնել նրանց փախչել։ Տղաները շատ շուտ համաձայնում էին, և նա հանդիպում էր նրանց ռեստորանը փակելուց հետո մի ապահով վայրում, ապա բերում տուն։ Ամենից առաջ վառարանում այրում էին զինվորի գերմանական համազգեստը, իսկ մութն ընկնելուն պես Շառլն իր քրոջ հետ վերցնում էր զենքն ու տանում, խցկում կոյուղու հորը։
Այդ ամենը կրկնվում էր այլ զինվորների հետ, ինչի արդյունքում ընդամենը մի քանի օրում Ազնավուրների՝ Նավարեն փողոցի փոքրիկ բնակարանում գիշերողների թիվը հասել էր տասնմեկի»,- ասված է գրառման մեջ:
Հ.Գ. Լուսանկարում Միշա Ազնավուրն է՝ Շառլ Ազնավուրի հայրը, Երկրորդ համաշխարհային պատերազմի ժամանակ: