«Հայփոստ» ՓԲԸ-ն դիմել է Կենտրոնական բանկին՝ էլեկտրոնային փողի թողարկման թույլտվություն ստանալու համար, որպեսզի կենսաթոշակառուները իրենց գումարները կարողանան նորից ստանալ փոստից ու կանխիկ, ոչ թե բանկային քարտով: Պատճառը կենսաթոշակառուների բողոք-ահազանգերն են:

Հիշեցնենք, որ այսօր «Հայփոստ» ՓԲԸ-ն հայտարարություն տարածեց, որտեղ նշված էր, որ բազմաթիվ բողոքներ է ստանում. կենսաթոշակառուները անհանգստություն են հայտնում իրենց կենսաթոշակի վճարման գործընթացի փոփոխման հետ կապված: «Հայփոստ» ՓԲԸ-ն հայտնում էր, որ դեռևս 2020 թվականի հոկտեմբերին դիմել է Կենտրոնական բանկ՝ էլեկտրոնային փողի թողարկման թույլտվություն ստանալու համար, որը հնարավորություն կտա շարունակել կենսաթոշակների բաշխման գործընթացը «Հայփոստ»-ի միջոցով, ինչպես բաժանմունքներում, այնպես էլ հասցեական առաքմամբ: Սակայն, պատասխան դեռ չի ստացել:

«Հայփոստ» ՓԲԸ մամուլի քարտուղար Գևորգ Աբրահամյանը մեզ հետ զրույցում պարզաբանեց՝ «Կենսաթոշակառու անձիք երբեմն դժվարություն են ունենում բանկային քարտով ստանալու իրենց կենսաթոշակները, այդ պատճառով «Հայփոստը» 2-3 ամիս շարունակ ահազանգեր է ստանում, որպեսզի մենք առաքենք իրենց գումարը կամ իրենք մոտենան և վերցնեն: Բացատրում ենք, որ դա մեր որոշելիքը չէ, և անհրաժեշտություն եղավ դիմել Կենտրոնական բանկ, որ մեզ թույլատրեն էլեկրոնային դրամապանակների միջոցով, որը հնարավորություն կտա կանխիկացնել գումարը, մարդկանց բաշխել իրենց թոշակները այնպես, ինչպես առաջ էր, այսինքն՝ ինչպես «Հայփոստ» բաժանմունքների, այնպես էլ հասցեական առաքման միջոցով: Բայց դեռևս թույլտվություն չունենք»: Աբրահամյանի խոսքով, հստակ չէ նաեւ, թե երբ Կենտրոնական բանկը դրական կամ բացասական պատասխան կտա:

«Հայփոստ»-ի խոսնակը նկատեց, որ թեպետ թոշակառուները ստորագրել են կենսաթոշակը բանկային քարտի միջոցով ստանալու մասին համապաստան պայմանագիրը եւ փոփոխությունը իրենց համար անակնկալ չի եղել, բայց գործնականում դժվարությունների են հանդիպում գումարը կանխկացնելիս:

Հավելենք, որ 2020թ. ընդունված «Պետական կենսաթոշակի մասին» օրենքի համաձայն՝ 2021թ. հունվարի 1-ից բոլոր նոր կենսաթոշակառուները Երևան, Գյումրի և Վանաձոր քաղաքներում իրենց կենսաթոշակները պետք է ստանան անկանխիկ՝ բանկային քարտերով: Կան որոշ բացառություններ: Այս սկզբունքը չի գործում, օրինակ, առաջին եւ երկրորդ խմբի հաշմանդամություն ունեցողների դեպքում:

Նյութի աղբյուր՝ armtimes.com