Նոր ալիքը 3 հաղթող ունի․ Էռնա Միրը կիսում է առաջին տեղը
Սոչիում կայացավ «Նոր ալիքի» մրցութային երրորդ օրը, որի ժամանակ մասնակիցները ներկայացրին երգերի պրեմիերաներ։
Արտյոմ Վալտերի և Սարինի հեղինակած In love երգով Էռնա Միրը ստացավ ժյուրիի բարձր գնահատականը։ Նա արժանացավ 120 միավորի հնարավոր 121-ից։ Ժյուրիի անդամներից միայն մեկը նրան տվեց 10 միավոր, մյուսները միակարծիք տվեցին 11 միավոր։
Երգչուհու պրոդյուսեր Լիրա Քոչարյանը Tert.am Life-ին հայտնեց, որ Էռնան առաջին տեղը կիսում է Ուզբեկստանի ներկայացուցիչ Սարդոր Միլանոյի և Մոլդովայի ներկայացուցիչ DOREDOS տրիոյի հետ։
Նշենք, որ առաջին 2 օրերի արդյունքներով Էռնան և Սարդորն արժանացել էին ժյուրիի առավելագույն գնահատականին և 2 օրվա արդյունքում ունեին 242 միավոր։ Այսօրվա արդյունքներով նրանք ունեն 363 միավոր։ DOREDOS տրիոն առաջին 2 օրերի արդյունքով ուներ 241 միավոր, այսօր խումբը ստացել է առավելագույն 121 միավորը և հավասարվել Էռնային և Սարդորին։
Հայաստանի մյուս ներկայացուցիչը՝ Սյուզաննա Մելքոնյանը, ևս այսօր ստացավ 120 միավոր՝ հնարավոր 121-ից։ Ընդհանուր առմամբ, նա ունի 357 միավոր և երկրորդ տեղում է։
Մրցանակների հանձնման հանդիսավոր արարողությունը կկայանա վաղը։
Աղբյուրը՝ life.tert.am