Նոր մանրամասներ՝ Ստամբուլում հայկական եկեղեցուց դուրս եկած հայերի վրա քարերով հարձակման մասին
Թուրքական լրատվամիջոցներն անդրադարձել են օրերս Ստամբուլի հայկական եկեղեցիներից մեկի մոտ հայերի վրա ազգայնականների հարձակմանը: Ինչպես գրում է թուրքական diken.com.tr կայքը, հարձակումը տեղի է ունեցել եկեղեցում մկրտության արարողությունից հետո բակում տեղի ունեցած հյուրասիրության ժամանակ:
Հիշեցնենք, որ Ստամբուլի հայկական Սուրբ Հովհաննես եկեղեցու մուտքի մոտ ազգայնականների խումբը քարերով հարձակվել է եկեղեցու բակում գտնվող հայերի վրա ու բղավել «Մա՛հ ձեզ»:
Ենթադրվում է, որ հայերի վրա քարեր նետողներին դուր չի եկել, որ հյուրասիրության ժամանակ քրիստոնյաներն ալկոհոլ են օգտագործել:
Թեմայի շուրջ պարզաբանումներ էր տվել պոլսահայ գործիչ Երվանդ Օզուզունը՝ Թուրքիայի ընդդիմադիր Ժողովրդահանրապետական կուսակցության հայազգի պատգամավոր Սելինա Դողանի հայրը:
Վերջինս լրատվամիջոցներին պատմել է, որ միջադեպի ժամանակ տարածքում որևէ ոստիկան չի գտնվել:
Ավելի վաղ Օզուզունը թուրքական artigercek.com կայքում գրել էր. «Սովորաբար կիրակնօրյա պատարագների ժամանակ մինչև պատարագի ավարտը հայկական եկեղեցիների մուտքի մոտ անվտանգության ուժերը պահակություն են անում: Պետության պարտականությունն է ապահովել իր քաղաքացու անձի և ունեցվածքի անվտանգությունը: Սա մեզ ուրախացնում է՝ ինչ խոսք: Սակայն այլ հարց է, թե ինչու է իրավիճակն այնպիսին, որ առանց ոստիկանի պահակության մեր իսկ հողերի վրա չենք կարողանում հանգիստ սրտով եկեղեցական պատարագ անել»:
diken.com.tr-ը նշում է, որ Ստամբուլի Ֆաթիհ շրջանում գտնվող Սուրբ Հովհաննես եկեղեցին կառուցվել է 1807թ.-ին և վերջին անգամ վերանորոգվել 2006թ.-ին:
Աղբյուրը՝ tert.am