Ջոնի Դեփը Ջեք Ճնճղուկի կերպարով այցելել է մանկական հիվանդանոց
Հոլիվուդյան հայտնի դերասան Ջոնի Դեփն իր ամենահայտնի կերպարներից մեկի՝ ծովահեն Ջեք Ճնճղուկի տեսքով այցելել է կանադական Վանկուվեր քաղաքի մանկական հիվանդանոցներից մեկը՝ անմոռանալի անակնկալ մատուցելով այնտեղ բուժվող փոքրիկներին:
54-ամյա աստղը հիվանդանոցում ավելի քան 5 ժամ է անցկացրել՝ անհատապես ողջունելով ու շփվելով ամեն մի երեխայի հետ: Նա նույնիսկ փոքրիկ ներկայացում է կազմակերպել հիվանդների համար՝ զվարճացնելով նրանց:
Դեփի այցից հետո հիվանդանոցի տնօրինությունը ֆեյսբուքյան էջում կիսվել է լուսանկարներով ու դրանց կից գրել. «Մանկական հիվանդանոցի հիվանդների ուրախությանը չափ ու սահման չկար աշխարհի ամենահայտնի ծովահեններից մեկի՝ նավապետ Ջեք Ճնճղուկի այցի կապակցությամբ: Դերասան Ջոնի Դեփը «ոսկի սիրտ» ունի, քանի որ ավելի քան 5 ժամ անցկացրեց մեզ մոտ ու առանձին հանդիպեց բոլոր հիվանդների հետ՝ նորածիններից մինչև դեռահասներ»:
Աղբյուրը՝ tert.am