Ինչպես տեղեկանում ենք «ՀԱՅ» ասոցիացիա բարեգործական հիմնադրամի ֆեյսբուքյան էջից ասոցիացիայի հիմնադիր տնօրեն Տիգրան Հովհաննիսյանն, ով տարիներ շարունակ օգնել և օգնում է անպտուղ ընտանիքներին՝ հանգանակություն կատարողների ու իր աջակցությամբ արտամարմնային բեղմնավորման տարբերակով ունենալ երեխաներ, այսօր հայր է դարձել: 

«Մեր անձնակազմը սրտանց շնորհավորում է Տիգրանին ու կնոջը՝ դուստր ունենալու կապակցությամբ:
Թող որ Ձեր երեխան Ձեր անձնվեր աշխատանքի շարունակողը լինի»,-գրված է գրառման մեջ:

Հիշեցնենք, որ ArenaNews.am կայքը Տիգրանի գործունեության մասին իր ընթերցողներին պատմել էր շատ ավելի վաղ. նա  թավշյա հեղափոխության օրերին ցուցարարների կողքին լինելու համար Իսպանիայից Հայաստան էր եկել:

Ասոցիացիան ոչ մի շահույթ չհետապնդող կազմակերպություն է, որի նպատակն է աշխարհի բոլոր հայերով միանալ ու թեկուզ փոքր ներդրումներով օգնել հայ ընտանիքներին ունենալ երեխաներ: Ի դեպ,  ընտրվում են այնպիսի զույգեր, ովքեր չունեն բավարար ֆինանսական միջոցներ, բայց իրենք հետագայում  կարող են երեխայի մասին հոգ տանել, կրթել, դաստիարակել:

Ասոցիացիային իրենց կոչով միացել էին քաղաքապետ Հայկ Մարությանը,  ՀՀ առողջապահության նախարար Արսեն Թորոսյանը, երգչուհի Իվետա Մուկուչյանը և այլ հայտնիներ:

Այս պահի դրությամբ ասոցիաիցային դիմած շահառուների թիվն անցնում է 1500-ի սահմանը: Դիմելու կարգի, չափորոշիչների և այլնի մասին կարող եք կարդալ մեր էքսկլյուզիվ հարցազրույցում: