Թուրքիան սկսել է ջուր և սննդամթերք մատակարարել Քաթարին ոչ միայն օդային, այլև ցամաքային և ծովային ճանապարհով։ Այդ մասին ասել է Թուրքիայի էկոնոմիկայի նախարար Նիհաթ Զեյբեկչին, գրում է թուրքական «Հյուրրիյեթ» պարբերականը:

«Մեզնից հիմնականում կաթնամթերք ու հավկիթ են ուզել: Արդեն 4 հազար տոննա բեռով նավը ճանապարհին է: Իսկ 11 հազար տոննա տարողությամբ ևս մեկ բեռնատար նավ Քաթար կուղղվի շատ շուտով: Հիմա էլ սկսել ենք բեռնատարներով առաքումը: Այն ժամանակ, երբ բոլորը տատանվում էին Քաթարի հարցում, մենք այնտեղ էինք: Այսուհետ էլ Թուրքիան Քաթարի կողքին է լինելու, դա այլևս անհրաժեշտություն է», – ասել է Զեյբեկչին:
Հայտնի է, որ մինչ այս պահը Թուրքիան 90 ինքնաթիռ սնունդ է մատակարարել Քաթարին:
Հիշեցնենք, որ Սաուդյան Արաբիան, Եմենը, Եգիպտոսը, Արաբական Միացյալ Էմիրությունները, Լիբիան, Մալդիվներն ու Բահրեյնը խզել են Քաթարի հետ դիվանագիտական կապերը: Բացի այդ, Քաթարը հեռացվել է Սաուդյան Արաբիայի գլխավորած և Եմենում գրոհայինների դեմ կռվող կոալիցիայից: Քաթարի դեմ արշավին միացել են նաև այլ երկրներ։

Աղբյուրը՝ tert.am