Ուկրաինայի նախագահ Պյոտր Պորոշենկոն հայտարարել է, որ Ռուսաստանը կառուցում է «Հյուսիսային հոսք-2» գազամուղը Կիևից վրեժ լուծելու համար՝ այդ թվում ռուսական «Գազպրոմ» ընկերության հետ վեճում «Նավթագազ»-ի օգտին Ստոկհոլմի արբիտրաժային դատարանի որոշման համար: ՌԴ-ն ցանկանում է կառուցել գազամուղը, որպեսզի «պատժի» Ուկրաինային՝ օգտագործելով գազի տարանցումը որպես քաղաքական և տնտեսական ճնշման գործիք: Այդ մասին Ուկրաինայի նախագահը հայտարարել է ուկրաինական լրատվամիջոցներին տված հարցազրույցում, հայտնում է zn.ua-ն:

Պորոշենկոն նշել է, որ նախագիծը չի հետապնդում տնտեսական կամ էներգետիկ նպատակներ, այլ չափազանց լուրջ վտանգ է Ուկրաինայի համար:

«Նպատակն է Ուկրաինային զրկել երկու միլիարդ դոլարից, որոնք նա ստանում է տարանցման համար: Դա Ստոկհոլմի համար վրեժ է, դա վրեժ է վճռական հակակոռուպցիոն բարեփոխումների համար»,- վստահ է նախագահը:

Ուկրաինայի վարչապետ Վլադիմիր Գրոյսմանը հունիսի սկզբին հայտարարել էր, որ երկիրն անում է ամեն ինչ թույլ չտալու համար «Հյուսիսային հոսք-2»-ի կառուցումը, քանի որ գազամուղը «վտանգ է ներկայացնում ոչ միայն Ուկրաինայի, այլև այլ պետությունների ազգային անվտանգությանը»:

«Հյուսիսային հոսք -2» գազամուղը Բալթիկ ծովով Ռուսաստանից Գերմանիա գազամուղի նախագիծ է, որը «Հյուսիսային հոսք» գազամուղի ընդլայնումն է:

Աղբյուրը՝ tert.am