ՀՀ տնտեսական զարգացման և ներդրումների նախարարությունը բարձր նշաձող է սահմանել՝ ներգնա տուրիզմի մասով զբոսաշրջիկների թիվը հասցնել 3 միլիոնի: Այս մասին ԱԺ-ում 2016թ.-ի պետական բյուջեի կատարողականի քննարկման ժամանակ հայտարարեց ՀՀ տնտեսական զարգացման և ներդրումների նախարարի տեղակալ Էմիլ Տարասյանը: 
ԱԺ «Ելք» խմբակցության պատգամավոր Մանե Թանդիլյանը հետաքրքրվեց, թե ի՞նչ մեխանիզմներով է նախարարությունը պատրաստվում իրականացնել այդքան մարդու հոսքը դեպի Հայաստան: 
«Այս պահին կա 1.2 միլիոնի հոսք: 3 միլիոնը անիրատեսական չէ՞, և ի՞նչ միջոցառումներ են արվում այս ուղղությամբ: Ինչպե՞ս եք նախատեսում դրանից 1.5 միլիոնը սփյուռքահայերի հոսք ապահովել: Այդ ի՞նչ հատուկ միջոցառում պետք է անեք, որ սփյուռքահայեր գան», – հարցրեց պատգամավորը: 
Փոխնախարարը պատասխանեց, որ զբոսաշրջիկներին ներգրավելու համար նախատեսվում է տարեկան 20 ծրագիր իրականացնել:  
«Տարեկան ծրագրերի քննարկման ժամանակ վերջնական արդյունքները կերևան, բայց արդեն իսկ կան 20-ից ավելի տարատեսակ միջոցառումներ, որոնք միտված են ներգնա տուրիզմի աճին»,-հավելեց փոխնախարարը:

Աղբյուրը՝ tert.am