Քաղաքացիական ակտիվիստ Սոնա Աղեկյանը ֆեյսբուքյան իր էջում ահազանգել է Երևանում հայտնաբերած ադրբեջանական կարագի մասին։

«Ամանորյա անակնկալ։ Այո, այո, Հայաստանի Հանրապետության մայրաքաղաքի վաճառասրահներում, փաստորեն, կարելի է ձեռք բերել « եղբայրական Ադրբեջանի» բարձրորակ արտադրության որակյալ կարագ։ Բայց հիասթափեցնեմ ու շտապեմ ասել, որ այն իրականում սփրեդ է և ըստ իս, նաև վտանգավոր հենց հայերի համար»,– գրել է Սոնան` հրապարակելով նաև հիշյալ ապրանքի տեսագրությունն ու լուսանկարը, որոնցից պարզ է դառնում, որ «Մոսկովսկոյե» անվանումով կարագն, իրոք, ադրբեջանական «Ֆարմեր» ընկերության արտադրության փաթեթավորմամբ է։

Սոնայի հրապարակմանն արձագանքել է ԳԱԱ Էկոկենտրոնի սննդի ռիսկերի գնահատման կենտրոնի ղեկավար, սննդագիտության դոկտոր Դավիթ Պիպոյանը։

«Մինչև դեկտեմբեր 30–ը խանութներում շրջայցեր ենք իրականացրել։ Նման տարայով կարագ ես ոչ մի համայնքում չեմ հանդիպել։ Այսօր ևս երեք համայնքի խանութներում առկա չէր»,– ֆեյսբուքում գրել է Պիպոյանը` հավելելով, որ այդ հարցով դիմել է նաև պետական մարմիններին։

Ի վերջո, Պիպոյանը նկարը հրապարակած քաղաքացուց պարզել է, որ կարագը ձեռք է բերվել ոչ թե խանութից, այլ փողոցից։ «Այ այստեղ պետք է ձեզ կրկին հիշեցնեմ, որ տարեվերջին բոլորիդ հորդորել եմ ձեռնպահ մնալ փողոցում վաճառվող կենդանական ծագում ունեցող մթերք ձեռք բերելուց։ Հիշեք, որ այսպիսով դուք էլ եք դառնում այս խախտումների մասնակիցը, որովհետև եթե դուք ձեռք չբերեք այս մթերքները, իրավախախտները, ուզեն թե չէ, կդադարեցնեն իրենց գործունեությունը»,– նշում է Պիպոյանը։

Հիշեցնենք` նույն կոչով տարեվերջին Պիպոյանը Sputnik Արմենիա ռադիոկայանի եթերում դիմել էր ՀՀ քաղաքացիներին` հորդորելով ձեռնպահ մնալ փողոցում վաճառվող կասկածելի ու վտանգավոր սնունդ գնելուց։

Աղբյուրը՝ armeniasputnik.am