«Երիտասարդ սերնդին առաջարկում եմ ընթերցել Աշոտ Աղաբաբյանի «ԹԱԿԱՐԴ» վեպը՝ նվիրված արդեն «բացահայտված» բացառիկ հետախույզ ՋՈՆ ՀԱՆԻՍՅԱՆԻ արտասովոր կյանքին». Գևորգ Դանիելյան
Գևորգ Դանիելյանը ֆեյսբուքյան իր էջում գրել է.
Այդ հիրավի եզակի մարդկանց մասին մեզ տրված չէ շատ բան իմանալ, դա բխում է ինչպես նրանց, այնպես էլ պետության անվտանգության շահերից: Խոսքս հատուկ պատրաստություն անցած և անասելի բարձր որակներով օժտված հայ հետախույզների մասին է: Այս համատեքստում երախտապարտ պետք է լինենք նրանց, ովքեր գոնե «վաղեմության ժամկետն» անցնելու հիմքով գեղարվեստական հարթությամբ մեզ հրամցնում են նրանց վառ կենսագրականի՝ հրապարակման համար թույլատրելի դրվագները: Երիտասարդ սերնդին առաջարկում եմ ընթերցել Աշոտ Աղաբաբյանի «ԹԱԿԱՐԴ» վեպը՝ նվիրված արդեն «բացահայտված» բացառիկ հետախույզ ՋՈՆ ՀԱՆԻՍՅԱՆԻ արտասովոր կյանքին: Վերջերս մարզումներից հետո, երբ սպորտային հագուստով դրսում էի և իմ կարծիքով՝ գրեթե անճանաչելի, ինձ մոտեցավ թիկնեղ և քննախույզ հայացքով մի մարդ, բարևեց և առանց այլևայլության ասաց, որ կամենում է ինձ մի գիրք հանձնել: Մարդկանց դեմքերը մտաբերելու իմ խոցելի հիշողությունը հերթական անգամ ինձ դավաճանեց, սակայն որոշեցի անկեղծ լինել և խոստովանել, որ չեմ կարողանում մտաբերել զրուցակցիս, հընթացս հույս ունեի, որ ինքն ինձ այլ մարդու հետ է շփոթում: Բայց չէի հաշվարկել, որ գործ ունեմ լեգենդար հետախույզի հետ, որը մարդկանց դեմքերը ճշգրտորեն մտաբերում է անգամ 20-30 տարի անց: Դե իսկ գրքի համար անչափ շնորհակալ եմ…