«Համաճարակային իրավիճակը բավականին լարված է, ոչ միայն Հայաստանում, այլև ամբողջ աշխարհում: Վերջին 14 օրվա տվյալների վերլուծությունները փաստում են, որ նախորդ 14 օրվա հետ համեմատ ունենք շուրջ 50 տոկոս դեպքերի աճ: Վարակի վերարտադրողական ցուցանիշը 1-ից բարձր է, ինչը խոսում է այն մասին, որ վարակը շատ արագ տեմպերով տարածվում է»,-այս մասին այսօր՝ հոկտեմբերի 13-ին, ասուլիսի ժամանակ ասաց Հիվանդությունների վերահսկման և կանխարգելման ազգային կենտրոնի վարակիչ և ոչ վարակիչ հիվանդությունների համաճարակաբանության վարչության պետ Ռոմելլա Աբովյանը:

Նա նշեց, որ մանկապատանեկան տարիքային բոլոր խմբերում 1.5-1.7 անգամ դեպքերի աճ է գրանցվել:

«Ըստ Եվրամիության չափանիշների մենք արդեն մոտենում ենք վառվող կարմիր գոտուն, այսինքն կարմիր գոտուց մոտենում ենք վառվող կարմիր գոտի: Հիվանդացության ցուցանիշը 475 է, եթե հասնի 500-ի և տեստերի դրական մասնաբաժինը, եթե լինի 12 տոկոս, կհայտվենք վառվող կարմիր գոտում»,-ասաց Ռոմելլա Աբովյանը:

Նրա խոսքով հիվանդացությունների ցուցանիշը բարձր է բոլոր մարզերում անխտիր, և հիվանդությունը երիտասարդացել է ու թիրախավորում է 30-50 տարեկան անձանց: Նաև կան դեպքեր երեխաների շրջանում, որոնք ունեն հոսպիտալացման կարիք: