Հռոմի կաթոլիկ եկեղեցու առաջնորդ Ֆրանցիսկոս պապն առաջին անգամ մասնակցել է իտալական RAI պետական հեռուստատեսությամբ եթեր հեռարձակվող թոք-շոուին և պատմել, թե մանկության տարիներին ինչ է երազել դառնալ, ինչպիսի երաժշտություն է սիրում և անվանել սիրելի գրողին։

Արգենտինայում իտալացի միգրանտների ընտանիքի զավակը հիշել է, որ շատ տարիներ առաջ շուկայում նկատել է մսագործի, ում գոգնոցից դրամապանակ էր կախված։

«Եվ ես ասացի, որ ցանկանում եմ մսագործ դառնալ։ Երբ հարցրեցին՝ ինչու՞, ես ասացի՝ ահա թե ինչքան փող ունի»,-հուշերով կիսվել է 85-ամյա հովվապետը։

Վատիկանի առաջնորդը պատմել է նաև, որ տարվել է քիմիայով։ Դա նրան մղել է դեպի բժշկություն։

«Ես պատրաստվում էի 19 տարեկանում բժշկական ֆակուլտետ ընդունվել, երբ ինձ կանչեցին ճեմարան»,-հայտնել է Ֆրանցիսկոս պապը։

Պապը հիշեցրել է իր սիրելի գրողի՝ Ֆեոդոր Դոստոևսկու մասին, նշել, որ սիրում է դասական երաժշտություն և տանգո։ Խոստովանել է, որ իրեն անհրաժեշտ է շփում, քանի որ ընկերներն ուժ են տալիս։