Mothership.sg կայքն ուշագրավ անդրադարձ է արել Սինգապուրի ամենահին քրիստոնեական եկեղեցուն, որը հայկական է ու կառուցվել է 1835թ.: Հայտնի է, որ եկեղեցին կառուցվել է տեղի հայ համայնքի կողմից:
«Երբ 1819թ. Սինգապուրը դարձավ առևտրային նավահանգստով քաղաք, հայերն այն առաջին առևտրականներից էին, որոնք եկան Սինգապուր: Չնայած, որ նորեկ հայերը սակավաթիվ էին, բայց 1820-ականներից նրանք սկսեցին կրոնական ծառայություններ անցկացնել: Սկզբում հայերը ծեսերն անցկացնում էին Առևտրի հրապարակի մատուռում: Սակայն ավելի ուշ նրանք հող ստանալու խնդրանքով դիմեցին բրիտանական իշխանություններին, ինչից հետո հայկական համայքը եկեղեցու կառուցման համար տարածք ստացավ: Ավելի քան 1 դար անց հայկական եկեղեցին շարունակում է կանգուն մնալ»,-նշում է անդրադարձի հեղինակ Տանյա Օնգը:
Վերջինը մանրամասնում է, որ եկեղեցին կառուցվել է Գ.Դ. Քոուլմանի նախագծով, որում ներառված են նաև հայկական ճարտարապետությանը բնորոշ լուծումներ:

Հայկական եկեղեցին կառուցվել է խաչի տեսքով, ինչը տեսանելի է միայն վերևից նայելու դեպքում:
Բացի այդ, Քոուլմանն այնպես է արել, որ եկեղեցու ճարտարապետական տեսքը ներդաշնակ լինի Սինգապուրի արևադարձային կլիմայի ու բնության հետ:
Աղբյուրը նկատում է, որ այն Սինգապուրում կլոր սրահ ունեցող միակ եկեղեցին է:
Ուշագրավ ճարտարապետություն ունենալուց զատ եկեղեցին հայտնի է նաև իր պանթեոնով, որտեղ հուղարկավորված են Սինգապուրի զարգացման գործում մեծ ավանդ ունեցող հայազգիներ:  Նրանց շարքում է Ագնես Ժոաքիմը, որը ստեղծել է Սինգապուրի ազգային ծաղիկ համարվող Vanda Miss Joaquim խոլորձի տեսակը:

Աղբյուրը՝ tert.am