Սեւ հովազ, աշխարհի ամենագայթակղիչ կին, սուպերմոդել, գեղեցկության իդեալ՝ այս բնորոշումները լիովին համապատասխանում են համաշխարհային նորաձեւության ամենաազդեցիկ դեմքերից մեկին՝ Նաոմի Քեմփբելին, որն այսօր՝ մայիսի 22-ին, նշում է ծննդյան 50-ամյակը:

Քեմփբելն առաջին սեւամորթ մոդելն էր, որը ժամանակին հայտնվեց անգլիական Vogue եւ Time ամսագրերի շապիկներին:

Մոդելն արդեն 20 տարուց ավել է՝ ասպարեզում է, սակայն պատանեկության տարիներին մոդելինգն այն չի եղել, ինչի մասին երազել է գեղեցկուհին: Նա ցանկանում էր դառնալ դերասանուհի, եւ մասնագիտացել է Լոնդոնի բեմական արվեստի ուսումնարանում: Նաոմին նկարահանվել է տարբեր երաժշտական հոլովակներում եւ ֆիլմերում: Նա որպես ժյուրի հանդես է եկել The Face շոուում, որի նպատակն էր բացահայտել տաղանդավոր մոդելներին:

Այսօր Նաոմին շարունակում է փայլել ամենահեղինակավոր ամսագրերի շապիկներին եւ մասնակցել անվանի դիզայներների ցուցադրություններին:

Ձեր ուշադրությանն ենք ներկայացնում սուպերմոդելի հայտնի մտքերից մի քանիսը:

«Եթե միեւնույն խնդրի մասին զրուցում եք 3-ից ավել մարդու հետ, նշանակում է՝ դուք ոչ թե օգնության, այլ ուշադրության կարիք ունեք»:

«Ոչինչ ինձ երբեք հեշտ չի տրվել ու հեշտ չի տրվելու, եւ դա նորմալ է: Ես սովոր եմ դրան, ես քայլում եմ մարտահրավերների ձեռքը բռնած»:

«Դու պետք է սխալներ գործես: Դրանցից ենք մենք սովորում, ու այդպիսին է աշխարհն, առհասարակ»:

«Ես երբեք չեմ ընկճվում: Երբ զգում եմ, որ ինչ-որ բան ինձ հարվածում է, ես, պարզապես, դա հետ եմ մղում, անհետանում եմ, որոշ ժամանակ անց վերադառնում»:

«Ես երբեք չեմ վախեցել ճանապարհորդելուց ու նոր վայրերից: Ամեն տեղ հեշտությամբ հարմարվում եմ»:

«Ես շատ-շատ եմ աշխատում եւ արժանի եմ իմ վաստակած ամեն մի ցենտին»:

«Չեմ կարծում, թե գեղեցիկ եմ ծնվել, ես պարզապես ծնվել եմ իմ «ես»-ի հետ միասին»:

«Կարծո՞ւմ եք ես շատ իշխող եմ: Ոչ, այդպես չէ, պարզապես, ես չեմ սիրում պարտվել, իսկ երբ ինձ ասում են «ոչ», ես իմ «այո»-ն ստանալու նոր ճանապարհ եմ փնտրում»:

«Յուրաքանչյուրն ունի բարկության չափաբաժին, դա էլ է էմոցիա»:

«Ինձ չեն մտահոգում թվերը, ես նորմալ եմ վերաբերվում մեծանալուն»:

Աղբյուրը՝ style.news.am