Բենզինի շուկայում որեւէ մեկին որեւէ բան չի պարտադրվում, ազատ շուկա է, գները բարձրանում ու իջնում են շուկայական գործոնների ազդեցությամբ: Այս մասին այսօր կառավարության նիստից հետո լրագրողների հետ զրույցում հայտարարեց տնտեսական զարգացման եւ ներդրումների նախարար Տիգրան Խաչատրյանը՝ խոսելով բենզինի գների մասին:

«Բաց շուկա է, եթե միջազգային գները բարձրանան, ներքին շուկայում էլ կբարձրանան, եթե իջնեն, պետք է ներքին շուկայում էլ իջնեն»,- ասաց նախարարը:

Հարցին, թե ինչ կանխատեսումներ կան բենզինի գնի մասով, նախարարն ասաց, որ որեւէ մեկը չի կարող ասել դա. «Եթե ինչ-որ մեկն իմանար այդ մասին, կդառնար աշխարհի ամենահարուստ մարդը: Կգնար կգներ որքան հնարավոր է շատ քանակությամբ բենզին, կսպասեր՝ այն կտրուկ թանկանա եւ կվաճառեր»:

Խաչատրյանը նշեց, որ բոլոր գործարարներն էլ ռիսկի են գնում, եթե գինը բարձրանա, կշահեն, եթե իջնի, կտուժեն. «Ամենակարեւորն այն է, որ գինը որոշի շուկան, իսկ գները շուկայական են: Բայց մենք կունենանք դրական զարգացումներ, վստահ եմ: Որքան շատ թվով խաղացողներ հայտնվեն շուկայում, մրցակցությունն այդքան կմեծանա ու շուկան ավելի զգայուն կլինի միջազգային շուկայի նկատմամբ: Այսինքն, սպասեք, որ շուկայում տատանողականությունը կավելանա, որովհետեւ, եթե շուկան բացարձակ մրցակցային է, միջազգային շուկայում ցանկացած փոփոխություն գների վրա պետք է ազդի»:

Խաչատրյանը կարծում է, որ բենզինի շուկայում նոր խաղացողներ կհայտնվեն, քննարկումներ ընթանում են. «Որքանով ինձ հայտնի է՝ դրսի ներդրողներին են վերաբերում քննարկումները»:

Աղբյուրը՝ armtimes.com