Գյումրիում վթարի հետևանքով մեքենաներից մեկում հրդեհ է բռնկվել․
Այսօր առավոտյան ավտովթար է տեղի ունեցել Գյումրիի Վազգեն Սարգսյան փողոցում։ Բախվել են Mercedes Benz և Opel մակնիշի ավտոմեքենաները։ Վթարի հետևանքով Mercedes մակնիշի մեքենայում հրդեհ է բռնկվել։ Անհրաժեշտ է եղել հրշեջ փրկարարական ջոկատի օգնությունը։
Մինչ հրշեջների՝ վթարի վայր հասնելը, հրդեհը տեղում մարվել է սեփական ուժերով։ Mercedes մակնիշի մեքենայում ուղևորներ չեն եղել։ Վարորդը ստացել է թեթև մարմնական վնասվածքներ։ Նա տեղում բուժօգնություն ստանալուց հետո հրաժարվել է տեղափոխվել հիվանդանոց։
Opel մակնիշի մեքենայում, որը տաքսի ծառայություն է մատուցել, եղել է մեկ ուղևոր։ Մեքենայի 34-ամյա վարորդը և ուղևորը գանգուղեղային վնասվածքներով շտապօգնության մեքենայով տեղափոխվել են «Գյումրի» բժշկական կենտրոն։
Բժշկական կենտրոնից հայտնում են, որ վարորդը գտնվում է վերակենդանացման բաժանմունքում, վիճակը գնահատվում է ծանր, ուղևորին հետազոտում են, վիճակի մասին կտեղեկացնեն ավելի ուշ։