Թիերի Անրին գովել է «Ինտերի» գլխավոր մարզչին, ակնարկել նաև Մխիթարյանի մասին
Ֆրանսիայի հավաքականի, Լոնդոնի «Արսենալի», կատալոնական «Բարսելոնայի» նախկին հարձակվող, Ֆրանսիայի երիտասարդական հավաքականի գլխավոր մարզիչ Թիերի Անրին Sky Sports-ի եթերում նշել է, որ շատ է հավանում Իտալիայի Ա Սերիայի առաջատար Միլանի «Ինտերի» իտալացի գլխավոր մարզիչ Սիմոնե Ինձագիի աշխատանքը։
«Վաղուց եմ հետևում Սիմոնե Ինձագիին, սկսած այն ժամանակվանից երբ նա «Լացիոյում» էր։ Նա մարզիչ էր, որը կարող էր գավաթային խաղերում մեծ խնդիր ստեղծել մրցակցի համար։
Այդպես եղավ նաև «Մանչեսթեր Սիթիի» դեմ Չեմպիոնների լիգայի եզրափակիչում։
Ես հավանում եմ Ինձագիի մոտեցումը երկու կենտրոնական հարձակվողներով խաղալու հարցում։
Ինձագիի 5-3-2 դասավորությունն «Ինտերում» Բարելայի, Չալհանօղլուի և Մխիթարյանի հետ միջին գծում աշխատում է, երբ նրանք վերահսկում են կենտրոնը և գնդակը հասցնում են Լաուտարո Մարտինեսին կամ Մարկուս Տյուրամին»,- Անրիի խոսքերը մեջբերում է Football Italia-ն։
Իտալիայի առաջնության 27 տուրից հետո «Ինտերը» 72 միավորով գլխավորում է մրցաշարային աղյուսակը և 15 միավոր առաջ է երկրորդ տեղում գտնվող Թուրինի «Յուվենտուսից»։